Пренамена на „Дом на АРМ“

Со саботното гостување на „Мизар“ во Прилеп, поточно во клубот „Апореа“ повторно се отвори долгогодишното прашање кога во Прилеп ќе се направи добар концертен простор?
Минатата година, општина Прилеп го зеде под своја власт „Домот на АРМ“ или како што е познат меѓу нас „Офицерски“. Намерата е овај објект да биде реновиран и доизграден за да би се користел како нова општинска зграда. Во меѓувреме одлично се најде за организирање на повеќе концерти и свирки како: „Од нас за Прилеп“, „Прилепски заговор“, „Winner Fest“, „Al&The Black Cats“, „Smut & Marrachash Orchestra“ и др. Не дека е кизнеј какво место но лично мене ми се допаќа андерграунд изгледот иако потсетува на комунистичките касарни бидејќи да не заборавиме за што служел претходно. Кога свиреја „Паркети“ кажаа дека тоа било најдоброто место каде што свиреле последно време. Или се зафркаваа со нас?
И сега доаѓаме до поентата на овај пост. Зошто да не се размисли со паметно вложување наместо општинска зграда овај простор да стане место за музички случувања. Нешто како „Дом за млади“ каде што би се искористиле и придружните простории како библиотека, место за изложби или собири на литературни друштва. Мислам дека просторот и не одговара баш за општинска зграда иако се наоѓа во центарот на градот. Подобро би било локалните власти да изградат потполно нова зграда на местото каде што се наоѓа сегашната. Така и оние малку љубители на алтернативната музика би добиле место каде почесто ќе уживаат во настапи на квалитетни музичари. Подобра изолација, реновирање, вентилација и уште мал милион други работи кој треба да се заменат во постојниот „Дом на АРМ“ се сепак голема инвестиција. Но кога може да се одвојуваат пари за други проекти не гледам причина зошто да не се инвестира во еден ваков објект. Го заслужуваме тоа, нели?

Лош спортски викенд

Силекс-Победа 1:0
На стартот од пролетниот дел од фудбалското првенство фудбалерите на Победа доживеаја непријатен пораз во Кратово. Подмладениот и речиси нов тим на црвено-белите не успеа да ги израдува своите навивачи против слабиот состав на Силекс. Голот за домаќините го постигна Заревски во 44 минута. Следниот викенд го пречекуваме незгодниот тим на Напредок од Кичево.

Вардар Осигурување-11 Октомври 3:0
Одбојкарите на 11 Октомври се поразени на гостувањето во Скопје со 3:0 (25:18, 25:16, 25:16). Со тоа продолжуваат релативно слабите резултати во првата лига ако се знаат големите амбиции пред стартот на сезоната.

Пролет-Тутунски Комбинат 25:24
Уште една наша екипа беше поразена во Скопје. Овојпат тоа беа ракометарите на Тутунски Комбинат кои повторно изгубија од Пролет минимално со еден гол како во есенската полусезона. Пред стартот на продолжувањето од ракометната лига беше донесена мизерна одлука со која долгогодишното име беше променето во глупавото, кретенското, идиотското „ВИП 2007“ кое се надеваме дека нема да продолжи да се користи во иднина.

Премиера на „Приказна за војникот“

Во недела на сцената на народниот театар „Војдан Чернодрински“ во 11.00 часот ќе се одржи премиерата на претставата „Приказна за војникот“ која е во реализација на театарската работилница на Центарот за култура „Марко Цепенков“. Режисер е Игор Трпчески по текст на Шарл Ф. Рами, кореографијата е на Кире Миладиноски, сцената и костимографијата се на Бојана Артиновска, а музика е на Игор Стравински. Во претставата учествуваат младите актери: Бобан Алексоски, Илија Волчески, Теодора Костадиноска, Елена Ристеска, Ангела Димоска и Наталија Трајкоска.

Мизар во Прилеп

Вечерва во клубот „Апореа“ свој концерт ќе одржи култната Македонска група „Мизар“. Тие пред прилепската публика ќе го претстават својот најнов албум „Поглед кон цветната градина“. Нема сомнение дека Горан Таневски, Горазд Чаповски и останатите членови на бендот ќе дадат се од себе да се прикажат во најдобро светло и на вистински начин да го приближат својот последен проект пред своите фанови. Претходно, на крајот од минатата година тие имаа голем концерт во Универзалната сала во Скопје. Влезот е 80 денари, а почетокот ќе биде околу 23.00 часот.

Нови истражувања на Стибера

Истражувачките задачи на локалитетот Стибера, античкиот град на скулптурите, ќе почнат напролет, а Министерството за култура годинава одобри еден милион денари, со што овој локалитет ќе биде во фокусот на интересирањата на археолозите. - Стибера е антички град каде што постоеле работилници на скулптори и на вајари, и таму се откриени 70-80 отсто од античките статуи и скулптури зачувани во целост. Со повеќе заложба Стибера може да стане интересна туристичка дестинација, вели директорот на Управата за заштита на културното наследство, Паско Кузман. Минатата година таму беше пронајдена и статуа на херкуланка, стара 19 века, која во својот двор ја откопа Васко Дебрешлиоски од селото Чепигово. Меѓу проектите што Министерството за култура ги одобри на прилепскиот Завод и музеј се и истражувачките и конзерваторски работи на манастирот Трескавец со црквата „Успение на пресвета Богородица“. Овој манастир е меѓу стоте најзагрозени споменици во светот. Оваа година ќе почне и првата фаза за зачувување на фрескоживописот во црквата „Свети Никола“ во Мариово, единствен по ликовите на фреските големи и по два и пол метра. Работите на теренот почнуваат во март, а од прилепскиот Завод и музеј не беа подготвени да ни дадат какви било информации.- Не се комплетно завршени сите проекти за работа на терените. Деновиве ќе имаме поконкретна подготовка на стратегијата за работа и екипирањето на тимот што ќе работи, вели Гордана Даниловска-Спировска, директор на прилепскиот Завод и музеј. Издвоени се пари и за конзервација на дел од Маркови Кули, кои се на листата на природните реткости, како и за стабилизирање на Саат-кулата.

Извор: Шпиц

58 години од првата претстава во Прилеп

Прилепскиот народен театар „Војдан Чернодрински“ вечерва ќе одбележи 58 години од изведбата на првата премиера со која театарот ја почна својата дејност во 1950 година. Ансамблот ја почна работата со претставата „Кир Јања“ од Јован Стерја Поповиќ, во режија на Аце Михајловски. Од тогаш до денес, во оваа куќа се одиграни 350 премиери и речиси 7.000 претстави, пред околу еден милион и четиристотини илјади гледачи.
- Со бројните настапи на матичната сцена и со гостувањата во земјава и во странство, со наградите добиени на Меѓународниот театарски фестивал „Војдан Чернодрински“ и на други фестивали, може да се пофалиме дека прилепскиот театар бил школа за многу наши доајени-изјави Стојан Дамчески, директорот на театарот. Според него, театарот е квалитетно доекипиран со млади актерски имиња, кои како и нивните искусни колеги, може да излезат на крај со улогите во класичните и во современите драмски остварувања.
Проблем со кој во моментов се соочува театарот е просторното решение бидејќи ансамблот се уште работи во истите услови од пред шеесетина години.
- Иако со новата организација од пред неколку години театарот е дел од Центарот за култура „Марко Цепенков“ и ја користи големата сцена на домот, сепак на матичната сцена и на објектот им недостига целосно реновирање. Пожелно би било да се бара нова локација, но тоа засега останува само голема желба на театарските уметници - додава Дамчевски.
Театарот во моментов ја подготвува претставата „Глави“, според текст на Петар Петрески, во режија на Бранко Ставрев, прва од петте претстави што се на програмата за оваа година. Премиерата се најавува за крајот на март.
Извор: Време

КЛО

„КЛО“ се еден од најоригиналните музички бендови што потекнува од Прилеп. Бендот е составен од тројца музичари: Дејан Змејкоски (гитара, бас), Соња Димитриоска (вокали, флејта) и Александар Ников (гитара). Нивната музика нема дефиниција. Звукот на „КЛО“ се состои од комплексни гитарски текстури и интроспективен и етеричен вокал. Бендот е под влијание на „Mazzy Star“, „My Bloody Valentine“, „Cocteau Twins“, „Cranes“ и др. Моментално го спремаат нивниот прв албум, а имаат издадено и едно демо кое е снимено во доста лоши услови. Соња има соработувано со „Mooger Fooger“ на првиот и на последниот албум, додека заедно со Дејан учествуваа во првиот албум на Пиколомини. Минатата години учествуваа со една преработка во реиздавањето на албумот на култната македонска група од 80-тите, „Бастион“. Досега имаат само два акустични настапи во „Канал 103“ радио и во клубот „Лудница“. Неколку нивни нумери можете да слушните на нивната MySpace страна.

Technorati Tags: КЛО, Музика, Прилеп, KLO, Band, Prilep.

Мартиноски со прва победа во дејвис куп

Илија Мартиноски ја забележа првата победа во дејвис купот во вториот настап. Тој во неделата славеше над Лејниекс со 2:0 (6/3, 6/4) и беше дел од големиот триумф на Македонија над тенисерите на Летонија со 4:1. Мартиноски се искачи на АТП рејтинг листата и сега се наоѓа на 1106 место со шест бодови.
Одбојкарите на 11 Октомври триумфираа во Струмица на стартот од пролетниот дел на одбојкарското првенство. Тие ја победија домашната екипа на Струмица со 2-3 (24-26, 25-22, 22-25, 25-23, 12-15).
Екипата на Победа го продолжува тренажниот процес пред стартот на пролетниот дел од фудбалската сезона. Веќе се договорени повеќе контролни натпревари. Екипата ја напуштија повеќемина стандардни играчи, а беа ангажирани пред се непознати фудбалери од Србија и Босна. Со каков состав ќе настапуваат во продолжение сепак ќе знаеме наскоро кога ќе се дефинира точниот список на фудбалери што ќе го носат црвено-белиот дрес

Почна акцијата за пошумување

Со засадување на дрвца во дворот на гимназијата „Мирче Ацев“ започна акцијата за пошумување на Македонија и во нашиот град. На 12 март е финалето на кампања, под мотото „Засади ја својата иднина“, која ќе кулминира со засадување 2 милиона садници. Раководител на акцијата е познатиот оперски пејач Борис Трајанов, а ќе учествуваат и други познати естрадни имиња како Каролина и Калиопи. Кампањата ќе има натпреварувачки карактер односно ќе се натпреваруваат градовите помеѓу себе кој повеќе садници ќе засади. Борис Трајанов ќе биде командант во Прилеп бидејќи и самиот има прилепско потекло, додека во Битола командант ќе биде Каролина Гочева. На самиот ден ќе има и музички концерти во сите градови со локални групи. Поддржете ја и вие акцијата. За подобра иднина на нашиот град.