Мото тура - Мариово 2008

Здружение на мото-ентузијасти и љубители на природните убавини „Мото Туринг“ со цел промовирање на мото-туризмот во Македонија ја организира првата мото тура Мариово 2008. Турата е опишана како 3-дневно (23, 24 и 25 Мај) дружење и запознавање со природните убавини на Мариовскиот регион, збогатено со релаксиранао возење, кампување во прекрасните ливади, акустична музика покрај логорски оган, локални специјалитети, пиво, вино...
Пријавувањето е во тек, а доколку сте заинтересирани можете да ја погледнете и програмата за тие три дена. На сите учесници им посакуваме пријатен помин и убаво време.

Второ место во светот за четворица прилепчани на натпревар по екологија

Во конкуренција на 375 екипи од 48 земји во светот четворица средношколци од Прилеп го освоија второто место на меѓународниот натпревар по екологија во Шведска што го организираа Обединетите Нации и корпорацијата „Волво“. Финалето се одржа од 9 до 14 мај.

Приказната за „Последните биволи во Македонија“ ги направи Катерина Николоска, Александра Ацеска, Славко Попоски и Симона Зероска од прилепското училиште „Орде Чопела“ славни во светот меѓу своите врсници, кои заедно со својот професор Наталија Ацеска неодамна се вратија со многу впечатоци и задоволни со успехот што го постигнаа.

„Ова е неверојатно искуство. Ја претставивме Македонија во најдобро светло, им раскажавме со какви богатства располага нашата татковина. Ова е поттик за нови проекти и за поголема заштита на животната средина“, велат учениците се уште под импресии, додавајќи дека „се чувствуваат како филмски ѕвезди кои добиле оскар. Така и не третираа во Шведска“.

Средношколците денеска беа примени од прилепскиот градоначалник Маријан Ристески.

„Убаво е чувството дека правиш нешто многу корисно воопшто за планетата Земја. Проектот беше необичен и за жирито“, изјави професорката Наталија Ацеска горда на успехот на своите ученици.

Четворицата средношколци цела година работеа на темата за биволите од селото Дебреште каде 13-те женки три години не родиле подмладок, соочувајќи се со изумирање. Спроведоа и кампањи во основните училишта за промовирање на оваа проблематика. Веднаш потоа на семејството одгледувачи, швајцарската амбасада им донираше машки бивол, па се роди и првото младенче.

Сега приватна млекарница е заинтересирана да го откупува млекото од биволите и да почне со производство на првата македонска моцарела. Вака го објаснуваат проектот учениците со кои ги воодушевија организаторите на светскиот натпревар во Шведска.

Паричната награда за освоеното второ место на овој меѓународен натпревар по екологија изнесуваше 6.000 долари.

Извор: А1

„Тапани во ноќта“ на Брехт премиерно во Прилеп

Претставата „Тапани во ноќта“ од Брехт во режија на младиот битолски режисер Мартин Кочовски, својата премиерна изведба ќе ја доживее вечерва во Народниот театар „Војдан Чернодрински“ во Прилеп.

Приказната е лоцирана на 14 јануари 1921 во Берлин, кога се случува крајот на Спартанистичкото востание против власта. Војник, оптоварен со сите специфики на поствоениот синдром по Првата светска војна, се враќа дома со надеж дека барем љубовта останала. Но, војната оставила траги и во животот на неговата сакана...

Режисерот Мартин Кочовски вели дека станува збор за ансамбл претстава во која 17 актери се постојано на сцената. „Тоа е спецификата, затоа и ретко кој театар продукциски може да го издржи Брехт. Претставата зрачи со брилијантна актерска игра, има многу пеење, танцување... Екипата има огромна инспирација, волја и енергија која зрачи од сцената. Успеавме да ја постигнеме прочуената слоевитост на Брехт“, истакнува Кочовски.

Во подготовката на овој проект, освен младиот ансамбл на матичната театарска куќа, гостува битолската актерка Илина Чоревска. Музиката е на групата „Фолтин“, сценографијата ја подготви Филип Јовановски, додека задолжена за 100-те костими во претставата е Јулијана Војнова-Најман.
Извор: Утрински Весник

Dedicated for Life во Апореа

Во недела на 18.05 во клубот „Апореа“ гостува една од нашите најдобри метал групи „Dedicated for Life“. Тие пред прилепчани ќе го промовираат нивните втор студиски албум „Another Dawn“. Првиот албум на ДФЛ „By all means“ можете да го преземете од овде. Ова ќе биде нивна трета промоција после првиот концерт во Скопје и синоќешниот во Куманово. Во составот на оваа скопска група членува и гитаристот Бобан Петрески од Прилеп, кој свири и во „Морталити“. Настапите низ Македонија се одлична подготовка за овај бенд пред нивниот настап на големиот метал фестивал во соседна Србија, „Castle Fest-Smederevo“.

Албумот „Another Dawn“ ќе може да се купи по цена од 250 денари. Освен тоа ќе се продава и друг рекламен материјал на групата како маици, пришивачи и беџови. Влезот е 50 денари, додека стартот е околу 23.00 часот.

Споменик на Итар Пејо

Споменикот на Итар Пејо треба да се постави во старата чаршија, во близина на Градскиот саат кај старата фонтана. Моментално тој простор е запуштен и ја нагрдува сликата за центарот на градот. Овај споменик би требало добро да се вклопи знаејќи дека голем број од анегдотите поврзани со Итар Пејо се одвивале токму во старата прилепска чаршија. Освен тоа овај простор би претставувал и летна сцена за културни, драмски и музички дела. Можете да погледнете како изгледа идејното решение:

Промовирана програмата за „Војдан Чернодрински“

Со претставата „Далај Мама“ од Љубиша Георгиевски, во режија на Дејан Пројковски, а во изведба на битолскиот народен театар, на 6 јуни на сцената од Центарот за култура „Марко Цепенков“ во Прилеп, ќе се крене завесата на 43-то издание на Македонскиот театарски фестивал „Војдан Чернодрински“.

Во текот на следните 6 фестивалски дена во официјална конкуренција ќе бидат изведени уште 9 претстави на македонските театри: „Комедија од грешки“ од Шекспир, во режија на Владлен Александров, а во изведба на струмичкиот театар, театарот на градот домаќин ќе го изведе проектот „Светилникот“ од Димитар Талев, во режија на Владо Цветановски. „Женички“ од Тунџер Џуџеноглу, во режија на Наташа Поплавска е претставата на турскиот театар од Скопје, а МНТ ќе ја изведе драмата „Дракула“ од Дејан Дуковски, во режија на Срѓан Јанаќиевиќ. „Импресарио од Измир“, од Карло Голдони, во режија на Ахмет Јакупи е проектот на тетовскиот театар, „Супернова“ од Лори Андерсен во режија на Златко Славенски е претставата со која ќе учествува Драмски театар од Скопје. Велешкиот народен театар ќе ја изведе претставата „Да се заборави Херострат“ од Григориј Горин, во режија на Зоја Бузалкова, а последните фестивалски денови ќе бидат изведени претставите „Војцек“ од Георг Бихнер, во режија на Куштрим Бектеши, во изведба на албанскиот театар и „Бегалка“ од Васил Иљоски, во режија на Дејан Пројковски од штипскиот театар.

„Публиката ќе може да проследи еден колорит од театарски претстави од сите жанрови, кои се потврда дека македонскиот театар се движи по една нагорна линија. Млади актери и млади режисери ќе доминираат и на овој фестивал“, вели Петар Темелкоски, уметничкиот директор на фестивалот.

Во придружната програма ќе бидат изведени 3 претстави: „Приказна за Роланд Кловнот од Мек Доналдс“ од Родриго Гарсија во режија на Софија Ристевска, „Сердарот засекогаш љубов“ во режија на Тихомир Стојаноски, а во копродукција на велешкиот и театарот „Скрб и утеха“ и испитната претстава по актерска игра на втора година во класата на професорот Кирил Ристоски.

Како што вели Темелкоски секој ден на пладне ќе се одржи и по една трибина на конкретна тема.

„Се уште не се дефинирани темите, ниту модераторите, промоторите, а не е утврден ниту составот на жири комисијата.Но, важно е дека Прилеп ќе живее театарски живот полни 24 часа, ќе има доволно културна понуда, дневно ќе можат да се следат и по три претстави“, потенцира Темелкоски.

Инаку годинешни добитници на наградите за животно дело се тројца истакнати театарски работници: Кирил Андоновски од МНТ- Скопје и Лидија Иваноска и Благоја Ивчески, двајцата актери од прилепскиот народен театар.

Со свечено доделување на наградите фестивалот ќе биде затворен на 12 јуни, кога во чест на наградените ансамблот на Драмски театар ќе ја изведе претставата „Комшилук наопаку“ од Нина Митровиќ, а во режија на Нени Делместре.
Извор: Утрински весник

Прилепски моден фестивал

Изминатиов викенд во Прилеп се одржа најавуваниот велигденски моден фестивал наречен Prilep Fashion weekend. Дел од настанот со свои креации беа Ненад Секирарски, Лепосава Дабеска и Томас - style, како и најпознатите бутици од Прилеп - Лукас и Дивано со светските брендови Енерџи, Мис сиксти, Стаф, Соул ејџ, Ред соул, Хепенинг, Оптил - очила, и Санда - Ист комерц, долна облека и костими за капење.
Моделите ги носеа манекени и манекенки од модното студио "Црнокрак", а за нивниот изглед се погрижија професионални шминкери и фризери од студиото и "Академија Авангард" од Скопје.
Извор: Вечер

Крстевски на изложба на мејл-арт

На Меѓународниот салон на уметничка пошта во галеријата "Шапел" во градот Дреуџ, Франција со свое дело учествува македонскиот уметник Златко Крстевски, покрај уметници од четиринаесет земји: Франција, Јапонија,САД, Луксембург и др.. Тема на изложбата е " Четирите времиња на мејл-артот". Изложбата дава акцент на овој креативен израз кака безвременска уметност, ослободена од разни стеги и бариери, давајќи му предност на слободниот уметничкиот чин.
Извор: Вест

Во Зрзе откриен монашки комплекс од 9 век

Во прилепскиот манастир „Свето Преображение“ во Зрзе, е откриен богат монашки комплекс кој датира од 12 век или два века порано од досегашните научни наоди. Во пештерата од бигорната карпа под сегашната манастирска црква, откриена е пештерска црква која најрано е датирана во 12 век. До црквата имало трпезарија, работилница за монасите, а констатирани се и 11 целини со 30 испоснички ќелии на четири ката. Секоја ќелија ја користел еден монах. Екипата археолози и конзерватори невестува дека при натамошните истражувања ќе се откријат уште десеттина други испоснички ќелии.

Ова неверојатно откриетие, велат стручњаците, го ситуира манастирот „Свето Преображение“ во Зрзе во нов научен, културен и религиски контекст, зашто постојат индиции дека има културни слоеви од 9 век. „Иако ова е прва фаза од истражувањата, не е прехрабро ако се каже дека овој монашки комплекс по својот обем и материјални појави кореспондира во религиска смисла со климентовиот комплекс во Охрид. Значи, една врска во религиозната историја, визави културната, визави политичката историја“, вели Бранислав Ристески, координатор на проектот.

Според Владиката Климент, резултатите од овие истражувања се потврда на верувањата на монашкото братство кое една декада живее во манастирот во Зрзе. „Има цврсти претпоставки дека со натамошните истражувања временската хронологија и датирање ќе стигне до 9 век и овој монашки комплекс ќе го изедначи со обновувањето на климентовото монаштво на Плаошник, кое е еден век постаро од Светогорското монаштво. Првата фаза од археолошките истражувања е повеќе од успешна, бидејќи монашката населба која досега беше бледо и патем споменувана во 14 век, веќе сигурно е поместена во 12 век“, изјави Владиката Климент.

На горното плато од денешниот манастир е откриена доцна античка населба од 4 век. Особено значаен сегмент од оваа акропола е ранохристијанската базилика која почетно датира од 5 и 6 век, а е лоцирана на издвоено плато на север од денешниот манастир. „На платото над бигорната карпа на простор од 4 до 6 хектари откриени се контурите на акрополата. Оваа населба не била дефанзивна. Имала повеќе управно-политички карактер. Оградена е со бедем со широчина до 1,40 метри, но до крај не е дефинирана. Дел од фазите треба да се истражат. Во секој случај, остатоците од бедемот се видливи на влезот на манастирот, па со досегашните сондажни истражувања јасно е издвоена доцната античка фаза“, вели координаторот Ристески.

Откриени се и многу површински објекти, низа материјали, движни наоди, садова керамика, стаклени садови, метални орудија...

Инаку, овој проект ќе биде финансиран од Министерството за култура со 560 илјади денари.
Извор: Утрински Весник